Agterryers - 'n Boodskap van God

Suid-Afrika (S.A.) met sy reënboognasie, verskeie tale en kulture, word gekenmerk deur sinnelose geweld, terreur, armoede, siektes, losbandigheid, onderdrukking en rassisme. Asof dit nie genoeg is nie, is S.A. besig om die stryd teen HIV-VIGS te verloor. Die stryd teen misdaad, is reeds ‘n verlore stryd, en dit het onmoontlik geraak om misdaad vanaf die strate (grond) te wen. Die politici, skryf die oorsaak van ons omstandighede onder andere toe aan die hoë werkloosheidsyfer en natuurlik, “Apartheid”. Die “regstellende aksie”, “oog vir ‘n oog” en die “Swart bemagtigings”, “ tand vir ‘n tand”, laat baie blind en haasbek in ‘n land waar regverdigheid, deur die balk in die Christendom se oë, ‘n troebel begrip kry.

Jan Alleman se begrip van, “hulle”, “julle” en “ons”, het daarom selde ‘n dieper betekenis, as blote “velkleur”. Die begrip van “waarheid en versoening”, het ook maar ‘n bitter pil geword, wat daagliks, in die mond van baie rond gedribbel word. Is “regstellende aksie” en “Swart bemagtiging” dan soveel anders as “apartheid”(!?). Of sou “rassisme” dan die “swartskaap” of, .... “witwolf” van ons gemeenskap wees?

In die vorige bedeling (Apartheidsera), waar ras, godsdiens, taal en kultuur, ‘n noue band of selfs ‘n skynbare eenheid gevorm het, het die geskiedenis van die Christendom ‘n verwronge beeld gekry. Hóé die geskiedenis opgeteken is, is ‘n goeie voorbeeld hiervan. Die komplikasies in hierdie verband hou vir die Christendom verreikende gevolge in.

As ons nie ag slaan hierop nie, herhaal die geskiedenis homself.

Die gesindheid wat ontstaan het agv. die wanpersepsie wat by derduisendes en selfs miljoene gekweek was/is, is daagliks sigbaar.

Deur die geskiedenis te ondersoek en die goeie te behou, dit as die waarheid te koester; die slegte af te sterf (as lesse deur ons voorgeslagte), sonder om iemand te oordeel (want die oordeel kom ons nie toe nie), maak ons wat en wie ons werklik is, broeders en susters in Christus Jesus. Nieteenstaande dié feit openbaar ons, as die Christendom van SA, deur ons lewenswyses, taal en monumente nie ‘n dankbaarheidslewe voor God nie. Die ongehoorsaamheid in die verlede leer ons dat dit goedkoper is om uit ander se foute te leer en met dit as leermeesters kan ons die toekoms aan ons kinders, teen ‘n winskoop bied......................as ons die saak met God regstel, in opregtheid!